| Mit voorwaerden ende servituyten:Eerst dat de voirn. Steffen van Blytterswick ende zijne nacomelingen t’haere believen zonder des voors. Jacop Dircxz.s contradictie haere huysinge sullen mogen uuytstecken soeverre dese huysinge uutsteeckende is, zonder nochtans te beletten ’t licht van alsulcken veynster als in den houck staende is op de bovencamer van desen huyse. In welcke veynster Jacop Dircxz voors. gehouden is ten eeuwigen dagen te houden alsulcke ijsers als daer nutertijt inne staen, sonder ‘tselve veynster oock van buyten opgaende te maecken.Voirts dat de voirn. Jacop Dircksz ende zijnen erven niet en sullen mogen betimmeren, bemuyeren, behinderen oft beletten ’t eerste benedenlicht van des voirs. Steven van Blyterswijchs vertreckcamer responderende op sijn erve naer de straete toe.Voirts dat alsoe de voorn. Blyterswijch deb voirs. Van Velsen in ’t timmeren van desen huyse geconsenteert heeft aen zijne zijtmuyere te metselen een halve steen dick, de voirs. Blyterswich ende zijnen erven t’alre tijt ende t’hare belieften zonder eenich becroon van den voorn. Jacop Dircxz haer zijtmuyer zulle mogen ofbreken ende weder opmetselen, latende alleenlick de voorn. muragie van een halve steen dick bij Dirck van Velsen voorn. gemaect ongeroert, zonder dat de voorn. Jacop Dircxz eenich recht of actie sal mogen pretenderen aen de muragie van den vooirn. Blyterswijch, anders dan tot de dicte van een halve steen toe, bij Velsen voorn. gemaect zijnde.Voirts dat de voors. Jacop Dircxz ende sijnen erven ten eeuwigen dagen gehouden sullen sijn te onderhouden buyten costen van Blyterswijch voorn. ende sijnen erven de looden goote, streckende van de middelgevel van desen huyse of tot aen de straet toe. Ende van gelijcken te onderhouden den goote loopende onder d’aerde voorbij de voorgevel van desen huyse, ten eynde ’t water van desen ende Blyterswijchs huysen comende, daerdoer bequamelicken wech geloost mach werden.Voirts met servituyten ende voerwaerden dat de vooirn. Philips van Noorden ende zijne successeurs, possesseurs van zijne huysinge in der tijt de scheytmuyr tusschen zijnen ende desen erve gelegen niet hoger en sullen mogen timmeren noch metselen. Noch en sal van gelijcken Philips van Noorde voorn. noch sijnen erven geen lichten in de voirs. scheytmuyr mogen maecken, responderende op ’t erve van desen huyse.Voirts dat de voorn. Philips van Noorde ende zijnen erven tot heuren beliefnen sullen mogen timmeren aen de zijtmuyr van desen huyse, zoeverre de aftercamer strect ende oock deur dezelve muyr anckeren, mits zijne anckeren niet te laten uuytsteecken deur de muyr. Mer sal in sulcken gevalle gehouden sijn die in te laten ten eynde men die weder sal mogen toepleysteren. |
