| Akte info |
Bron (scan)/
Bedrag | Soort/
Betalingswijze | Nr | Fol | ScanNr/
Lasten | Datum | Perceel | - |
| Cartularium-HGW-1318-1541 | rente | 012 | 3 | | 1341-05 | | |
| 0-14-6 £-s-p | | 0-0-6 (1), 0-0-4 (2), 0-0-4 (3), 0-0-6 (4) | Ketelboetersteeg | 16129 |
Dit sien die renten in die Weversteghe.
Wi rechter, scepenen ende raet van Leijden maken kont allen luden dat Dirc van der Scure van Voirburch voir ons quam ende gheliede dat hi vircoft heeft Jacob Griete Didden sone ende Dirc Tierloot die nu ter wilen meesters sien van den heijlighen gheest van Leijden tot des heijlighen gheest behoef voirscr. viertien scellinghe ende ses penninghen hollans vrijs ghelts iairlixer renten die Aechten sinen wive op bestorven waren van hare moeder doot iairlix. Te versien op husinghe ende op hofsteden die hier na ghescreven staen.
- Inden eersten op dat huijs ende optat erve dat nu ter wilen Dirc Allairts soens is ende gheleghen is inde Weversteghe. Ende beleghen heeft Lijsbeth Jacobs mit horen huse ende erve an die een zide ende Alijt Hughen mit horen huse ende erve an die ander zide ses scellingen hollans tsiairs.
- Voirt optat huijs ende optat erve vier scelling hollans tsiairs dat beleghen heeft Dirc die Vos mit sinen huse ende erve andie een zide ende Mathijs Jans Milden zone mit zinen huijse ende erve an dander zide.
- Voirt op dat huijs ende erve vier scellingen hollans tsiairs dat Mathijs Jans Milde soens is ende beleghen heeft Dirc die Vos mit sinen huijse ende erve an die een zide ende Jacob Hannen soen mit sinen huijse ende erve an dander zide.
- Voirt op Jacob Hannen soens huijs ende erve ses penninghen hollans tsiairs dat beleghen heeft Mathijs Jans Milden soen mit sinen huse ende erve an die een side ende mit Poirtgraft van Leijden an dander zide.
Ende dese renten voirseijt iairlix te betalen tot Voirscoten ende Valkenburgher marcten. Ende Doedekijn Dirc Doeden soens kinder die sullen hebben tot desen renten voirnoemt twalif penninghen hollans tsiairs. Ende Dirc van der Scure voirsz. die heeft hem belier hier of volsaen ende betaelt, den lesten penninc mitten eersten.
In kennesse der wairheijt so hebben wi desen brief bseghelt mit onser ghemeenre poirt zeghel. Ghegheven int iair ons heren 1300 een ende viertich des donredaghes na meijen dach. |
|
|
