| Met voorwaerden dat Abraham Gerrytsz voors. ende zijnen naecomers tot heurluyder costen ten eeuwigen daegen onderhouden zullen de benedenste looden goete leggende tusschen dit voors. huys ende des voorn. Claes Joostensz.s huys. Ende dat insgelijcx de voors. Claes Joostenz ende zijnen naecomers tot heuren costen ten eeuwigen daegen onderhouden zullen de bovenste looden goete tusschen beyde de voors. huysen leggende. Met servituyten mede dat de voors. Cornelis Jansz van Thol ende naecomelingen tot heuren believen zullen moegen tymmeren, anckeren ende vestigen in de zijdelmuyer van desen voors. huyse. Mits dat dezelffde Cornelis Jansz ofte zijnen naecomers alsdan sculdich ende gehouden zullen wesen tot heuren costen te doen maecken ende leggen, ende voorts ten eeuwigen daegen onderhouden een looden goete op dezelve zijtmuyer, daer hun beyder waeter inne gevangen ende deur geloost zal moegen werden. Voort met servituyt dat Claes Joostenzoon voors. ende zijnen naecomers altijts hebben ende behouden zullen deur desen huyse den inganck van des voorn. Claes Joostenz.s kelder, zulcx hij die jegenwoerdelicken heeft. Noch met voorwaerden dat Claes Joostensz ende Abraham Gerrytsz voors. ende heuren naecomers t’samen ende tot heur beyder costen onderhouden zullen de private behoerende tot desen huyse ende des voors. Claes Joostenz.s huys, ’twelck hij staende heeft in de Butterstege. Ende dat men dezelve private tot heur beyder costen als die vervolt zal zijn zal doen ledigen ende scoonmaicken, duer des voorn. Claes Joostenz.s huys in de Butterstege staende. Voort mit voorwaerden dat Abraham Gerrytsz ende Claes Joostenz voors. ende heuren naecomelingen t’samen ende tot heur beyder costen onderhouden zullen het sceytmuyertgen hem t’samen toebehoirende, staende in ’t sceyt van heur beyder plaetsen oft’ erven. |
